O val de Lóuzara. Foto: A.C. Ergueitos
O fermoso val de Lóuzara, no montañoso concello lugués de Samos, foi o lugar onde pasou boa parte da súa vida o poeta Fiz Vergara Vilariño, inválido tras unha grave doenza que o recluiu na súa casa natal, onde pasou toda a súa vida adicado á literatura. A asociación Ergueitos de Sarria leva varios anos promovendo o Roteiro literario “Fiz Vergara Vilariño”, un percorrido polo val da Lóuzara que combina as paisaxes literarias do poeta con obras artísticas de figuras como Primitivo Lareu, Mónica Alonso, Paco Pestana ou Manuel Caamaño, ubicados en lugares decisivos da súa vida e obra. O roteiro iníciase no lugar de Aira Padrón, en Samos, de onde di Vergara Vilariño: "e vese tamén a Lóuzara Xabreira/-¡aló/embaixo!-/afondada nun sartego verde/verde/verde".
