Mostras por cupo

“En cantos espazos consegues que unha exposición poida ser vista por xefes de goberno, pola elite política europea, entre 5.000 e 7.000 persoas nun so día?”. A pregunta do eurodiputado Francisco Millán Mon ten unha resposta: o Parlamento Europeo. Esta institución conta con 27 espazos expositivos repartidos en tres sedes e abertos a todas as propostas. Un escaparate perfecto para exhibir a creación cultural.

É un dos capítulos máis escuros da historia polaca. Estímase que entre 15.000 e 22.000 cidadáns polacos foron exterminados a mans do Exército Ruso no marco da Segunda Guerra Mundial. Chamóuselle a masacre de Katyn e deu pé a unha das exposicións máis emotivas das que acolleu a sede do Parlamento Europeo na súa historia. Preto de mil persoas acudiron a inauguración desta exposición que, ademais, serviu de improvisada homenaxe ao recén finado presidente polaco, Lech Kazcynski, así como dos viaxantes do accidentado voo Tupolev 154. “É unha das exposición que máis me impactou” asegura Francis Guttman, responsable da sección de Eventos do Parlamento Europeo. E non é nada doado lembrar unha acción cultural no marco do Parlamento tendo en conta que cada ano se realizan nas súas sedes unhas trescentas actividades. Guttman explica que se poden empregar calquera dos espazos que hai nas sedes da institución (en Bruxelas, Estrasburgo e Luxemburgo) “para calquera actuación sexa exposición, concertos ou proxeccións que teñan unha dimensión europea e, por suposto, non revistan un carácter comercial”. A faceta expositiva do Parlamento Europeo implica unha actividade que ha de chegan baixo o amparo dun parlamentario (que elixe, solicita e financia esta actividade). “A instancia de parte realízanse actividades que teñen que ver con algún acto simbólico como pode ser o día de Europa pero son menores” asegura. En todo caso, Guttman explica que todas as actividades teñen un ríxido protocolo, que atende ás necesidades de seguridade e de organización dunha entidade na que traballan unhas 5.000 persoas. Dos 27 espazos espallados polas tres sedes do Parlamento Europeo destaca o Yehudi Menuhin, en Bruxelas, que toma o seu nome do violinista e compositor ruso activo defensor de causas humanitaria. "É a xoia da coroa onde todo o mundo quere desenvolver a súa actividade" apunta Guttan, ao tempo que explica que as exposicións son a actividade maioritaria e que as asiáticas son sempre as que máis visitantes atraen.

A cota galega
O eurodiputado galego Francisco Millán Mon (PP) empregou o seu cupo (teñen limitada unha exposición por lexislatura, e outra solicitude máis para a presentación dunha rexión ou posto de información) nunha mostra, como non, sobre o Camiño de Santiago. Nada raro tendo en conta que é o presidente dun intergrupo sobre o que é o primeiro itinerario cultural europeo. “Pretendíamos pór de relevo o espírito europeo da ruta xacobea, e fixémolo cunha exposición de fotógrafos de gran renome internacional-entre eles o galego Manuel Vilariño- que acompañaban a un gran mapa europeo”. A exposición tivo lugar en Bruxelas, co apoio e colaboración da Xunta de Galicia, e durou só 11 días. Para Millán Mon é un tempo máis que suficiente “a cantidade de persoas que pasan por aquí nun só día é infinitamente superior á que podes conseguir cun só mes no instituto Cervantes”.

A exposición, como toda actividade que se organiza nas instalacións do Parlamento, non é aberta ao público en xeral. Cada deputado pode tramitar un máximo de 50 convites de persoas alleas ao Parlamento Europeo.

As liñas xerais de acción cidadá
Cun orzamento de dous millóns de euros, o Parlamento organiza accións que pretenden dar a coñecer a súa actividade sobre os cidadáns. Son accións mediadas polo prisma cultural que están relacionadas a efemérides concretas (9 de maio, Premios Sajarov…) que normalmente pretenden estender a súa acción sobre os cidadáns. Entre todas elas destaca os convenios coas salas UCG, o principal grupo europeo do sector da exhibición cinematográfica, para a proxección de filmes presentados aos premios Lux. É dicir, as salas de Bruxelas, Roma, París, Madrid, Lyon, Estrasburgo e a sede do Parlamento Europeo proxectaron (versión orixinal subtitulada, claro está) os 27 títulos, un por cada Estados Membros, coa intención de amosar a diversidade cultural dos países da Unión Europe. Alén desta actividade, cada unha das oficinas estatais do Parlamento, ten liberdade (con cargo ao seu orzamento) para convocar outras accións culturais. Ignacio Samper, director da oficina en España, explica que nesta entidade se organizan actividades a propósito do “Día Europeo da Música, o Día Internacional da Muller e o Día dos Discapacitados”, accións que se poden celebrar a golpe de música, cine ou conferencias.