A literatura de viaxes monopoliza a literatura do 20 ao 27 de xuño

Viaxes históricas ou modernas, en soportes tradicionais ou coas novas tecnoloxías pero todos os actos que se suceden do 20 ao 27 de xuño teñen a literatura de viaxes como epicentro. O I Encontro Internacional de Literatura de Viaxes , que organiza o Xacobeo con motivo do Ano da Lectura, conta con sete apartados: unha peregrinaxe de escritores (desde Navarra a Santiago), unha serie de conferencias; unha feira internacional de dereitos para editores, axentes literarios e autores; unha feira aberta ao público; presentacións, encontros e sinatura de libros polos autores; actos de animación de rúa e un congreso propiamente dito que leva o epígrafe “As literaturas do camiño”. Nace con vocación de continuidade e, segundo a nota de prensa remitida por Cultura, pretende crear unha “plataforma valiosa para o sector, de talla internacional” e “chegar ao público de todo o noroeste peninsular”.