Curtocircuito adiántase a maio

Mesma estrutura, mesma programación e mesma calidade pero cinco meses antes. A Concellaría de Cultura de Santiago adianta ata maio (a semana oficial terá lugar do 23 ao 30) a celebración de Curtocircuíto. ¿A explicación? “Detectamos que existía unha saturación de actividades de cinema no mes no outono co Festival Amal e con Cineuropa e decidimos movelo no calendario” explican desde o gabinete de prensa. A sétima edición de curtocircuíto xa está en marcha co peche do prazo de recepción de candidaturas. Malia o adianto das datas que recurtaba os prazos, a organización recibiu 2.303 curtametraxes de países tan dispares como Azerbaiyán, Colombia, Xordania ou Filipinas, segundo figura no web oficial do certame.