Páxina de Álex Cal para G.I. Joe Operation Hiss
Once das páxinas do cómic book G.I.JOE Operation Hiss #1 levan a sinatura de Alex Cal. O debuxante vigués ilustra un guión de Brian Reed para a editora IDW nesta serie, que xa está á venda en Estados Unidos. O autor verá este mes tamén a edición en galego e castelán de Vento do Norte, que sairá nun só volume en cada idioma da man de El Patito Editorial. Pola súa banda, Head Space é o título da historia que debuxa Emma Ríos sobre un guión de Devin Grayson no volume colectivo Girl Comics #1, que sae á venda mañá mesmo en Estados Unidos da man de Marvel. Para abril está previsto o lanzamento de Irredeemable Special 1 no que a galega asina unha das tres historias do volume, con guión de Mark Waid. Máis perto de nós, José Domingo incorpórase á lista de autores de Los Reyes Elfos: Historias de Faerie que publicará Dólmen Editorial. Domingo realizará a historia de dez páxinas Una Guerra Olvidada con guión de Víctor Santos.
