Francisco Domínguez substitúe a Fernández del Riego á fronte da Biblioteca Penzol

É o principal arquivo documental da historia da cultura galega e do galeguismo. Naceu, por iniciativa da editorial Galaxia, cos fondos do bibliófilo Fermín Penzol. A día de hoxe conta con máis de 50.000 volumes, oito coleccións completas de xornais, manuscritos do fondo antigo (do século XVI ao XVIII) e tiña como director a Francisco Fernández del Riego (Lourenzá, 1913). Pois ben, despois de 46 anos ininterrompidos no cargo, del Riego será substituído por Francisco Domínguez. O padroado da fundación votará este mes o seu relevo, aínda que non será efectivo ata o vindeiro ano.