Capa de As Serpes Cegas
O Premio Nacional de Cómic, que outorga cada ano o Ministerio de Cultura foi nesta edición para o álbum As serpes cegas, do mallorquín Tomeu Seguí e do madrileño Felipe Hernández Cava, segundo adianta o crítico Álvaro Pons no blog La Cárcel de Papel. A obra foi editada polo colectivo galego BD Banda na nosa lingua e en castelán no pasado 2008, sendo a primeira coedición galego-francesa neste campo. O álbum xa fora recoñecido co Premio da Crítica, o Premio Diario de Avisos ao Mellor Guión e o premio do Saló del Còmic de Barcelona á Mellor Obra e ao Mellor Guión entre outros recoñecementos. Os autores da obra recibirán un total de 20.000 euros.
