O Museo de Arte Contemporánea de Vigo, o MARCO, iniciou este ano unha nova liña de traballo coa organización de exposicións individuais. Despois da proposta de Santiago Sierra, o vindeiro 16 de outubro terá lugar a de Jorge Barbi (A Guarda, Pontevedra, 1950). Unha mostra que se basea na idea do percorrido, do paseo e da observación cotiá da natureza. É o prato forte da programación do último trimestre no que haberá espazo para a proposta gañadora do Premio para Novos Comisarios (Mirrors/Espellos), o cuarto proxecto de Puntos de Encontro, o programa formativo para adultos e a festa do sétimo aniversario do MARCO (13-15 de novembro).
