Hoxe no festival de cómic brigantino o premio nacional de cómic Paco Roca falará para o público entre as 18:15 e as 19:30, no segundo andar do céntrico Kiosco Alfonso. Despois tocaralle quenda á inglesa Posy Simmonds, que presentará o seu "Tamara Drew" recén publicado en castelán. Será das 19:45 ás 21:00 horas. Mais non remata aí a actividade.
Mañá sábado será a ocasión de ver o prestixioso Scott McCloud (Boston, 1960), un dos principais teóricos da linguaxe do cómic a nivel internacional. El pechará as conferencias desta XII edición do Salón Internacional Viñetas desde o Atlántico. A cita é ás 18:15 horas, tamén no Kiosco.
A charla de McCloud pon o punto final ás actividades de Viñetas, aínda que, como sempre, as exposicións permanecerán abertas ao público unha semana máis, ata o 24 de agosto.
Ademais mañá sábado, día 15, os autores convidados a esta edición de Viñetas desde o Atlántico asinaranlles aos afeccionados exemplares das súas obras de 12 a 13,30 horas, no Kiosco Alfonso. Aos convidados pola organización súmanse moitos outros creadores que visitan a feira, como foi onte o caso de Manel Cráneo ou Fernando Iglesias.
