Hai dez anos, un grupo de afeccionados ao circo decidiu xuntarse para facer un espectáculo diante dos amigos. Así naceu a primeira Festa do Circo. O encontro foi medrando en número de participantes, de público e foi o xermolo do que saíron numerosos grupos entre os que destaca Pista Catro. Esta fin de semana celebra a décima e última edición cun repaso aos espectáculos que se exhiberon nesta década. Os seus organizadores decidiron non continuar co encontro para dar paso a novas iniciativas e proxectos. A Festa do Circo, que se desenvolve na Sala Nasa de xoves a domingo, contará coa presenza de grupos como Circabaret, do Circo Rumano, do Freak Show, o Circo Global, o Hincrible Circo Favuloso, o Circo TV e o Circo Mafia que recuperarán algúns dos espectáculos presentados na feira nestes últimos anos.
