Unha ración de circo

Lusco e fusco,Arrepentimentos de Padrón, Roces e Goces, Duelirium e Almacabra Teatro-Circo son as cinco compañías que ofrecerán esta noite unha pequena mostra do que se está a facer en Galicia de novo circo. Son pequenas mostras do seu traballo que se empaquetan como un único espectáculo que sirve, ademais de carta de presentación do novo circo, de avance dos cambios que experimentará a feira. Os showcases ou os días temáticos son algúns dos formatos que estuda Agadic para este encontro destinado a fomentar a distribución exterior das compañías galegas.

Autoría: creación colectiva
Produción: Asociación de Novo Circo Pistacinco
Elenco: Pablo Reboleiro, Alfredo Pérez Muíños, Antón Coucheiro, Borja Fernández, Raquel Oitavén, Mercé Solé, Sue Moreno, Alfonso Medina, Aitor Garuz, Vanesa Rivas, Yolanda Paz

Circo á feira é unha degustación do que se coce no caldeiro do Novo Circo Galego, un espectáculo que reúne extractos de cinco producións de compañías galegas: aéreos, acrobacias, clown, teatro e malabares xuntos nun dispositivo escénico contemporáneo.

Duelirium, Aviadoras. Acrobacias aéreas artelladas para contar a historia de dúas mulleres excepcionais, a norteamericana Tiny Broadwick e a soviética Marina Raskova.

Almacabra, Nas nubes. Proposta visual e poética, dirixida a un público familiar, na que se combinan acrobacias aéreas, malabares, zancos e manipulación de obxectos.

Lusco e Fusco, Encontros (teatro acrobático). Espectáculo multidisciplinario no que o teatro físico, a danza e o novo circo se conxugan para crear un código propio de expresión.

Arrepentimentos de Padrón, ADN (teatro físico-científico). Proxecto dun espectáculo de teatro que mestura a interpretación de dous actores coa proxección audiovisual para narrar unha historia dramática cos recursos cómicos do clown.

Roces e Goces, Roces e Goces (clown malabarístico) ao máis puro estilo de rasca e pica e con diferentes habilidades circenses. Estes dous clowns pasados de rosca fan da violencia unha brincadeira.