Logo do éxito que acadou a súa primeira itinerancia, a exposición A memoria do mar, do Museo do Mar de Galicia, volta aos nosos portos. A exposición está organizada en tres bloques temáticos, Cos pés no mar, centrado en imaxes da costa, Do areal ao peirao, que amosa a evolución das praias, e mais O mar mirado, que se centra nas imaxes do propio mar. Cada unha das partes itinerará ao longo dos vindeiros meses por diferentes localidades costeiras que non visitou con anterioridade, adaptando os seus contidos a cada etapa. A Guarda, Malpica e Cambados inician o percorrido. Achegámosche algunhas das imaxes da mostra e mais os folletos que explican a exposición e as súas paradas.
