Unha exposición lembra a guerra submarina en Galicia

As costas galegas foron escenario, durante a II Guerra Mundial, de feros combates submarinos e acollen aínda hoxe restos daqueles enfrontamentos. Agora, cando se fan setenta anos do comezo daquelas batallas, o Museo Militar da Coruña acolle desde hoxe e ata o vindeiro 30 de agosto unha exposición que amosa uniformes, maquetas fotografías e outros materiais relacionados con aqueles feitos. De xeito paralelo, presentacións de libros e conferencias permitirán coñecer polo miúdo como era a vida nun submarino naqueles tempos ou os principais fitos da guerra submarina nas proximidades do noso país. O programa está organizado pola Asociación de Amigos do Museo Militar da Coruña e mais por The Royal Green Jackets.