A Consellaría de Cultura colaborará coas editoriais galegas para garantir a súa presenza nas feiras internacionais Liber (Madrid), o salón de Frankfurt en Alemaña e de Guadalajara, en México. Así o anunciou esta mañá o responsable desta área, Roberto Varela, logo do encontro que mantivo cos representantes do sector. Ademais, Varela sinalou que nos vindeiros días sairá publicada a orde que regula os subsidios destinados a grandes proxectos editoriais, tanto en formatos tradicionais coma en novos soportes. Cultura tamén contempla a posibilidade de adquirir novidades editoriais do sector galego, aínda que supeditou esta medida ás dispoñibilidades orzamentarias. Do mesmo xeito, Varela anunciou a celebración de foros, debates, e eventos temáticos para a celebración do Ano do Libro e da Lectura, en 2010.
