A Coruña acolle o ciclo Escrita(s), sobre textos e superficies

Un ciclo de conferencias que chama a reflexionar sobre "a complexidade dos diferentes textos e superficies onde quedan rexistradas as repeticións e as diferenzas de producir relación co Mundo". Escrita(s), sobre textos e superficies achegará á Galería Sargadelos da Coruña a Xiana Arias, Oriana Méndez, Ana Salgado ou Roi Vidal, que tratarán ámbitos coma o artefacto, a poesía con vontade comunal das últimas décadas, a estrutura relacional da blogosfera ou a estética do teatro contemporáneo. Entre as propostas inclúese a performance Coma un can sen dono: escrita curricular a cargo de Rober Bass e Leo. Os actos celébranse cada xoves ás oito da tarde ata o vindeiro 18 de xuño na sala da Rúa Real 56.