Láncara acolle os actos oficiais de celebración do Día das Letras Galegas

A tranquilidade de Láncara (Lugo) vaise ver alterada este sábado coa celebración do Día das Letras Galegas. Como é habitual cada 17 de maio, o plenario da Real Academia Galega trasládase á localidade de nacemento do homenaxeado para desenvolver unha sesión extraordinaria. O Láncara natal de Ramón Piñeiro acollerá un programa de actos que comezará ás 11:30 da mañá cunha recepción oficial na Casa do Concello. Seguirá o pleno no que falarán Ramón Villares, Víctor Freixanes e Andrés Torres Queiruga e rematará cunha ofrenda floral diante do busto de Ramón Piñeiro no lugar de Carracedo.