A maioría dos galegos acode, como mínimo, a unha actividade cultural ao ano

Oito de cada dez galegos asistiu a algún espectáculo ou actividade cultural no ano 2006. Así se desprende do informe Ocio e hábitos culturais dos galegos que fixo público o Observatorio da Cultura que mantén o Consello da Cultura Galega. Segundo ese estudo, os menores de trinta anos son os que máis asisten ás actividades culturais, desde concertos de música clásica, ata a lectura de libros ou asistencia ao cine. Por xéneros, as mulleres son as que teñen mellores hábitos culturais (len máis, van a máis concertos de música clásica aínda que practican menos deporte). O estudo tamén conclúe que o nivel de ingresos e de estudos está relacionado co consumo cultural.