O Premio Castelao de Banda Deseñada, considerado o máis importante do país pola súa contía, chega á V Edición. O Boletín Oficial da Provincia da Coruña recollía o pasado día once as bases desta convocatoria, que conta cun único premio de 6.500 euros e inclúe a publicación da obra gañadora e mais a realización dunha exposición sobre a mesma. Os interesados en participar deberán remitir unha historia rematada, de entre 48 e 64 páxinas, a cor ou en branco e negro.
