O álbum ilustrado O oso e o corvo, do selo galego OQO Editora, recibiu o Premio de Ilustración 2008 do certame Visual de Diseño de Libros 2008. Este galardón, outorgado pola prestixiosa revista de deseño Visual, recoñece os deseños das mellores publicacións editadas en calquera das linguas oficiais do Estado. O ilustrador portugués André da Loba ilustrou a obra a partir dunha serie de esculturas de cartón. Os escenarios presentan fondos lisos e claros, poboados con personaxes de concepción cubista e gran forza expresiva, e todo en cores primarias. O seu traballo plástico alicérzase nunha investigación anterior durante a que o artista estudou o movemento e o equilibro en figuras tridimensionais realizadas con material de refugallo. O galardón será entregado o vindeiro 3 de marzo no Museo Reina Sofía en Madrid.
