Cun bo produto non abonda, senón que este debe ter tamén unha boa imaxe. E isto é o que pretende evidenciar o Anuario da Creatividade Galega 2008. Un volume que compila os mellores traballos de deseño e publicidade feitos por profesionais galegos no último ano. En total máis de mil proxectos pretenden recoller a calidade que hai en Galicia, tal e como apunta Chechu Pérez, profesor da Universidade de Vigo e un dos autores desta publicación. O volume conta co patrocinio da Xunta de Galicia, a través da sociedade Galicia Calidade. A principal novidade deste traballo, que xa conta con tres edicións, é o incremento de produtos seleccionados, así como a incorporación das asociacións profesionais de publicistas e de deseñadores que hai en Galicia.
