Mercar libros, discos e filmes galegos ten premio. A Consellaría de Cultura acaba de pór en marcha unha campaña promocional que regalará discos cunha compilación de música galega actual e cadernos de notas a quen compre produtos culturais galegos. A campaña “A cultura que facemos, escóllea no Nadal”, acompañada de anuncios publicitarios nos medios de comunicación, chegará a 300 librarías, quioscos e 70 tendas de discos de todo o país. Esta iniciativa pretende recoller o impulso levantado polo éxito do Cultur.gal, a feira das industrias culturais, cuxo consello asesor acaba de decidir que o encontro se celebre anualmente na Coruña. As 37.000 persoas que visitaron o recinto este ano impulsaron a decisión de que a cidade herculina fose a sede permanente.
