Vinte e cinco traballos que amosan as distintas sensibilidades coas que se abordou o álbum ilustrado en Galicia nos últimos dez anos. Esta é a proposta de O álbum galego: 25 miradas para unha década (1997-2007) que percorre os anos nos que este formato con grandes ilustracións e pouco texto revolucionou o noso panorama editorial. O Salón do Libro Infantil e Xuvenil de Pontevedra amosaba na súa última edición a selección de orixinais que escolleu a Asociación Máislibros para representar este proceso. A coincidir co Nadal, achegámoste unha completa galería que, alén dun agasallo para a vista, tamén pode dar un bo feixe de ideas para agasallar.
Desde a súa inauguración a mostra pasou por bibliotecas coma a de Pontevedra e Compostela, e fixo parte da presenza galega nos XIV Encontros Luso-Galaico-Franceses do Libro Infantil e Xuvenil. De cara ao futuro, está previsto que estes orixinais viaxen ás diferentes feiras internacionais de literatura nas que haxa presenza galega.
