Un informe recomenda duplicar os investigadores para ser competitivos en I+D+i

“Sería necesario, cando menos, duplicar o persoal investigador no medio prazo se queremos ser competitivos”. Esta é unha das conclusións que aparece no informe Territorios innovadores. Diagnose dos índices de I+D+i en Galicia, un documento que analiza os indicadores neste edido de cara a identificar as súas deficiencias. Ademais de definir os conceptos principais e facer un diagnóstico da situación, establece unha serie de recomendacións para mellorar as políticas nos eidos estratéxico, organizativo, financeiro e dos recursos humanos. O documento foi elaborado pola Sección de Ciencia e Tecnoloxía do Consello da Cultura Galega e presentouse na sede desta entidade.