Os penedos de Traba xa son Paisaxe Protexida

A "singularidade natural, estética e o valor científico" dos penedos de Traba valéronlle, segundo a Xunta, a declaración deste espazo coma Paisaxe Protexida. O Consello da Xunta aprobaba esta mañá a medida, que implicará iniciativas de protección e de difusión da zona. Esta área de 212 hectáreas, que se estende entre Laxe e Vimianzo, comprende unha serie de formacións graníticas singulares. Ademais do valor paisaxístico, a declaración incide no valor científico destes penedos, xa que permiten coñecer a evolución deste espazo. Esta é a segunda declaración de Paisaxe Protexida que fai a Xunta, despois da protección do val do río Navea en novembro deste mesmo ano.