A Rede Galega de Teatros e Auditorios é un circuíto creado en 1996 para facilitar a difusión de espectáculos galegos. Nestes anos foi incrementando o número de entidades que fan parte da rede, así como as facilidades para promover a contratación co obxectivo de consolidar o mercado das artes escénicas. O DOG publica hoxe as novas normas de funcionamento que inclúen pequenos mecanismos correctores que foi solicitando o sector.
Entre as novas medidas destaca o descenso dun 5% da obrigatoriedade de programar espectáculos en galego de teatros e auditorios de titularidade pública (do 80 ao 75%), así como a mellora no cofinanciamento de espectáculos nas localidades de menos de 30.000 habitantes. Relacionado coa distribución dos espectáculos, Luis Bará, director xeral de Creación e Difusión Cultural, anunciou no marco do Cultur.gal que en 2009 nacerá unha nova rede baixo o nome de Espazos Escénicos.
