Agadic flexibiliza as normas de funcionamento da Rede Galega de Teatros e Auditorios

O Diario Oficial de Galicia publica hoxe a resolución que modifica as normas de funcionamento das programacións incluídas na Rede Galega de Teatros e Auditorios. Uns cambios que se reducen a dúas características. En primeiro lugar, elimina o número de mínimo de espectáculos que un programador deberá incluír no seu espazo para entrar na rede e que antes era de 14, 11 e 8 en función do número de habitantes da localidade na que se situaba. E, en segundo lugar, elimina o número mínimo de funcións que unha compañía ten que desenvolver para estar neste circuito de distribución. Antes as compañías tiñan que ter un mínimo de tres funcións, límite que desaparece para as galegas e queda en dúas para as de fóra.

Polo demais, as novas normas de funcionamento manteñen as mesmas porcentaxes de confinanciamento desta ferramenta fundamental para a distribución de espectáculo. Ademais, tendo en conta o retraso en abrir os prazos nesta ocasión, as normas fixan en dous os períodos de programación: un que se desenvolve entre abril e agosto e outro entre setembro e decembro.