Kiko da Silva inicia serie propia en El Jueves

Camiloeurista é o título da tira que o galego Kiko da Silva comeza a publicar esta semana na revista humorística El Jueves. A serie, prevista nun comezo para oito entregas, é unha versión sen fillos do personaxe Emilioeurista, que o debuxante fai semanalmente para edicións locais de La Voz de Galicia. O debuxante achega unha mostra deste traballo no seu blog. Pola súa banda, David Rubín aproveita tamén este medio para explicar polo miúdo a súa nova obra Cuaderno de tormentas e adiantar varias páxinas o mesmo. Rubín explícanos tamén que, logo da súa recente visita a México, unha distribuidora deste país dispoñibilizará as súas obras na capital azteca.