Cultura presenta unha guía para xestionar clubs de lectura

Lecturas compartidas é o título do libro no que Eva López explica cómo crear e xestionar un club de lectura. A Consellaría de Cultura acaba de publicar en formato pdf no seu web esta obra, coa que quere animar o desenvolvemento deste tipo de actividade. No libro, López fai un repaso ao funcionamento destas propostas e aborda posibilidades coma os clubs virtuais ou os centrados na literatura infantil e xuvenil. A versión impresa desta obra preséntase esta mesma tarde na Biblioteca de Pontevedra, no marco das xornadas formativas que se están a realizar sobre clubs de lectura nas catro capitais de provincia.