Se a semana pasada se presentou a Axenda de Investigación da Plataforma Tecnolóxica do Audiovisual, chega o momento do sector do produto gráfico. Esta mañá deuse a coñecer en Santiago o calendario de iniciativas de investigación que afectan a máis de cincuenta entidades vencelladas aos sectores da publicidade, as artes gráficas e a edición. Esta entidade pretende xuntar na mesma mesa empresarios do mundo gráfico, investigadores e tecnólogos para establecer unha folla de ruta para innovar nos produtos e servizos, desenvolver proxectos conxuntamente e fomentar a formación dos traballadores. Segundo os datos desta plataforma, o sector da edición conta con 2.000 empresas en Galicia que dan traballo a 7.435 persoas.
