Feira Galega das Artes Escénicas 2008 - Montaxes

"Guau!", "Glub", "Non" e "si" son as catro palabras que se din en Babiliglub, a última aposta de Galitoon Producións. Unha montaxe que conta a historia dun peixiño que só sabe dicir Miau!; o que provoca unha desafortunada resposta por parte da fauna mariña composta por peixes multicolores e un polbo que só acertan a dicir "non!". Un "non!" lóxico nun universo mariño onde o guay, o propio e "politicamente correcto" é dicir "glub!".
Que ten que suceder en Babiliglub, unha obra de monicreques en luz negra que nada nun mar de música, movemento e cor para que se poida proferir o ansiado "si" que o espectador agarda? Xa o verás. Un discurso pola tolerancia e a aceptación da diferenza.

Crítica

Minianimalismo por Beatriz Bravo

Para viaxar non hai que moverse. Só hai que pechar os ollos o tempo xusto de dicir miau. E xa estamos nas profundidades do mar. Así de doado. Ben acompañados pero sen escapatoria. Porque Babiliglub é un espectáculo que acapara por completo os sentidos. Negro sobre negro, o cálido colorido de peixes, luras e demáis fauna marítima conquistan a nosa mirada, que descubrimos de novo infantil.

Galitoon regálanos unha proposta minianimalista, dunha beleza plástica e inxenua, que atopa precisamente na súa sinxeleza a forza para cautivar ó público máis novo. Un brillante exercicio de hipnotismo que fala das dificultades de ser distinto dun xeito natural, directo e diferente.

Glub.

Galitoon presenta Babiliglub, unha obra feita con só catro palabras