Preséntase en Muros Fishernet, a rede europea de patrimonio pesqueiro

Representantes das consellarías de Pesca e de Cultura presentaban esta mañá na Confraría de Muros o proxecto Fishernet, rede europea de patrimonio pesqueiro. Esta iniciativa, promovida desde a confraria de Lira, desenvolverase ao longo de tres anos co apoio de fondos do Departamento de Cultura da Unión Europea. A proposta reúne diferentes iniciativas que se desenvolven arredor do patrimonio pesqueiro no Reino Unido, Bulgaria, Chipre, Islandia e Noruega canda ás confrarías de Lira, do Pindo e de Muros e mais a Coordinadora Galega de Minusválidos. A achega galega a este proxecto é de 400.000 euros, que se investirán en proxectos de intercambio de experiencias, emprego de novas tecnoloxías e propostas de divulgación para recuperar e coñecer mellor o patrimonio pesqueiro. O proxecto completarase con intervencións artísticas relacionadas con este ámbito.