Emma Ríos, seleccionada para o programa de BD euroasiática Língua Cómica

A debuxante coruñesa Emma Ríos ten sido seleccionada para a terceira edición do programa Lingua Cómica, consistente nunha bolsa de creación de banda deseñada. A Fundación Euroasiática ASEF en colaboración co Museo Internacional de Manga de Kyoto (Xapón) convoca estas axudas para as que selecciona catorce autores e emparella cada creador oriental con outro occidental. No caso da debuxante galega, a súa compañeira será a malaisiana Hwei-Lin, gañadora do segundo premio no concurso internacional de manga da editorial Kodansha. Agora as dúas artistas colaborarán a través de Internet durante dous meses e despois encontraranse na cidade xaponesa de Kyoto, do 8 ao 16 de novembro. Os catro primeiros días traballarán baixo a supervisión dun titor, e os catro últimos participarán en conferencias e postas en común dos proxectos de cómic desenvolvidos.