Os encontros de cerámica de Sargadelos ábrense á reflexión técnica e de deseño

É xa unha tradición con case corenta anos ás costas que cada verán as instalacións de Sargadelos en Cervo acollan visitantes de todo o mundo interesados en aprender e compartir experiencias sobre a cerámica. A maiores desta iniciativa, os vindeiros 29 e 30 de xullo celébranse nestas instalacións o Taller Internacional de Tendencias Cerámicas. Tecnoloxía, usos e formas. O encontro conta este ano coa participación das tres universidades galegas e de centros coma o Instituto de Cerámica ou mesmo de centros de arte contemporánea coma o Centro Galego de Arte Contemporánea ou o MARCO de Vigo. Neste encontro, ademais de analizar as posibilidades de deseño, tecnoloxía e de innovación industrial neste campo, reflexionará tamén sobre o rumbo que se lles pode dar a este tipo de encontros. De xeito paralelo manterase durante quince días un encontro de vinte creadores chegados de sete países diferente que desenvolverán pezas de caracter artesán.