"Constatamos que hai un sustrato común", aseguran desde a organización da Bienal de Arte de Pontevedra, "que emparenta as creacións á marxe de procedencias ou proxenias físicas". E é que a trixésima edición da Bienal de Arte de Pontevedra, titulada Sen fronteiras. Converxencias hispanomagrebíes busca explorar dous territorios con fortes vínculos xeográficos, a Península Ibérica e o Magreb, pero dúas tradicións sociorelixiosas moi diferenciadas. 29 creadores norteaficanos e españois participan nesta edición.
A Bienal, dirixida por José Carlos Valle Pérez, director do Museo de Pontevedra, está comisariada polo marroquí Abdelkrim Ouazzani, pintor e director do Instituto de Belas Artes de Tetuán (Marrocos) e ten como asesores a expertos arxelinos e tunecinos. A selección hispana levouna a cabo o crítico e comisario Xosé Manuel Lens.
