Os vinteseis artistas gañadores do VII Certame de Artes Plásticas Isaac Díaz Pardo en Sada. O pintor lucense
Otero-Yglesias en Lugo. Héctor Francesch e unha escolma de pintores do século XX na Coruña e Diego Xiráldez en Porriño. Exposicións por toda Galicia paras as semanas previas ó Nadal.
Colectiva no Museo Maside
Vinteseis artistas dos cento cincuenta e dous que se presentaron ó VII Certame de Artes Plásticas Isaac Díaz Pardo expoñen a partir de hoxe as súas obras no Museo Carlos Maside de Sada. Esta mostra recolle as máis variadas tendencias expresivas, e logo da súa estancia neste museo iniciará un percorrido itinerante por diferentes localidades do país para rematar engrosando os fondos da Deputación Coruñesa, entidade que convoca o premio e que adquiriu todas as obras seleccionadas por sete millóns de pesetas.
Reflexión sobre os museos
O pintor lucense Jesús Otero-Yglesias inaugurou onte no museo provincial de Lugo a mostra "Museo" que pretende ser unha reflexión sobre os propios espacios de exposición. A mostra, recollendo unha idea posta en marcha polo suprematista ruso Malevitch, cubre do teito ó chan as paredes das salas de exposición con sesenta e sete cadros de diferentes tamaños que Otero-Yglesias realizou nos últimos catro anos.
As obras amosan a persoal recreación que fai o autor da paisaxe, reflexionando sobre o propio proceso de creación da pintura paisaxística. A mostra permanecerá aberta ata o día trinta e un decembro.
Tres exposicións máis
Os cadros de Héctor Francesch, que o seu autor define coma "alegres" poden verse desde hoxe na sala Príncipe de Asturias das Escolas Populares Gratuítas da Coruña. Esta exposición amosa un distanciamento con respecto a anteriores traballos deste artista, e pode verse ata o vindeiro día vintedous.
Na mesma cidade a galería Arte e Imagen vén de abrir a mostra "Recordando el siglo XX" que ofrece obras de Colmeiro, Grandío, Seoane e Laxeiro entre outros a uns precios que oscilan entre as cento dez mil e o medio millón de pesetas, para que os amantes da arte poidan facerse un regalo de Nadal.
Máis ó sur, en Porriño, o centro cultural da vila acolle unha mostra do pintor realista Diego de Giráldez, que se apropia de fragmentos da realidade para amosar a súa percepción do mundo. A mostra estará aberta ata o quince de xaneirol, e na inauguración que se celebrará hoxe ás oito o pintor presentará o seu libro "A realidade e o seu espello".
