Turespaña prepara o vindeiro Xacobeo cun plan para xestionar o turismo do Camiño

O Camiño de Santiago é unha ruta consolidada e de gran visibilidade a nivel internacional, por iso o reto pasa agora por mellorar a oferta turística. Tendo en conta que o vindeiro Ano Santo é o 2010 e está á volta da esquina, o goberno está preocupado por atraer o maior número de visitantes posible e achegarlles uns servizos de calidade. Por ese motivo, Turespaña, entidade pública que depende do Goberno Central, acaba de presentar unha convocatoria para redactar un plan estratégico que sexa quen de xestionar a oferta turística.