Alumnos e profesores de Rianxo recuperan o léxico mariñeiro da vila

10 profesores e 95 alumnos do Instituto Félix Muriel de Rianxo están a levar a cabo un interesante proxecto de recuperación de léxico tradicional chamado "No meu mar, na miña lingua". Coordinados por Tina Formoso, coordinadora do Equipo de Normalización Lingüística, os alumnos e os profesores enquisan a mariñeiros, anciáns e monitores de escolas de vela e remo colleitando palabras do mundo tradicional do mar e compilándoas nun banco de datos. O equipo pensa montar unha serie de actividades de divulgación con posterioridade ao traballo de campo, como unha exposición ou un calendario con coplas colleitadas entre os vellos de Rianxo.