Un selo, dous álbums e colaboracións en revistas son os novos proxectos de David Braña na BD

O guionista David Braña, de orixe catalá aínda que afincado en Vigo, comeza o ano 2008 cargado de proxectos. Por unha banda, recentemente puña en marcha "Seventeen Cómics", un selo co que quere dar saída ás súas obras. Baixo este epígrafe, e en coedición coa editora catalá FXGràfic agarda editar a súa obra "Law&Co", unha historia detectivesca que sairá nun cómic-book de 40 páxinas editado a branco e negro este mesmo ano. Ao tempo, coa editora Drakul prepara para mediados de 2008 a edición do álbum "DOS", unha historia de misterio ambientada na costa catalá. Finalmente, para marzo agárdase que vexan a luz seis historias curtas da súa autoría nunha nova revista que editará tamén FXGràfic.