Esta fin de semana preséntase chea de variedades e de propostas artísticas. Polo lado das exposicións temos que destacar dúas: a do pintor Jorge Castillo no Centro Galego de Arte Contemporánea, e a do escultor Manuel Buciños no Museo Municipal de Ourense. No apartado dos premios, cómpre destacar que o pintor Fernando Villoslada acaba de gañar o concurso "Bello Piñeiro" que concede o concello de Mugardos.
Pintura no CGAC
O Centro Galego de Arte Contemporánea prepararase, durante a fin de semana, para acoller a obra do artista pontevedrés Jorge Castillo (1933). Unha obra que comisaria Kosme de Baraño, e na que só se recolle a súa dimensión pictórica, malia que traballou noutras facetas: debuxo, escultura e gravado.
Castillo volve a Santiago logo de ter exposto na cidade compostelana no Museo do Pobo Galego (en 1990) e na Casa da Parra, nunha mostra antolóxica que recorreu Barcelona e varias cidades europeas.
As formas do bronce
Fiel ó seu estilo e ás súas propias señas de identidade característica, Manuel Buciño presenta a súa última obra escultórica no Museo Municipal de Ourense. Cincuenta pezas que rotarán en diferentes cidades españolas amosarán o amor, o vínculo nai-fillo como as principais constantes temáticas da súa obra.
Unha pintura de premio
Fernando Villoslada Garzón é o último gañador do XI Concurso de pintura "Bello Piñeiro" que anualmente organiza o Concello de Mugardos e que está dotado con 150.000 pesetas. Villoslada está fóra dos circuitos e correntes actuais, de entrevistas e actos sociais, e na súa faceta plástica tamén traballa en diferentes disciplinas como a escultura e o moldeo.
