CORREO
RSS
Ti estás aquí > Inicio / / A Pobra do Brollón presenta o seu Festival de Improvisación Oral
A Pobra do Brollón presenta o seu Festival de Improvisación Oral
xullo 19, 2023
O primeiro encontro de improvisación oral da Pobra de Brollón bota a andar na fin de semana do 22 e 23 de xullo. O festival Brindadeira nace cunha programación na que participarán "improvisadoras de brindo e regueifa de toda Galicia e mais da tradición vasca de bertso". Segundo explica o concello, con esta iniciativa quérese recuperar a tradición do brindo, forma de improvisación oral propia da zona.
Obradoiros de improvisación a cargo de Sara Marchena, Alba María, Lorena Medela e Nuria Penas, actuacións das vascas Uxue Alberdi e Miren Amuriza con tradución en directo ou mostras de regueifa a cargo do Caruncho e de Os d'Herbón son algunhas das actividades que se desenvolverán na primeira xornada. Pola noite haberá concertos a cargo de artistas que parten da improvisación, neste caso o dúo Aldaolado e High Paw xunto con O Rabelo.
Canda a isto, haberá un vermú de presentación da editorial bilbaína Consonni, con raíces no concello e cunha actuación de Lois Prado. Unha mesa redonda sobre oralidade, tradición e feminismo ou un paseo da man da veciñanza pola aldea de Ferreiros son outras propostas que fan parte do programa.
No domingo, unha nova sesión vermú reunirá "unha ducia de artistas locais e achegadas para interpretar músicas tradicionais recollidas en Ferreiros, así como unha sesión de romances guímaros arredor de historias da tradición oral de todo o territorio da Pobra do Brollón".