CORREO
RSS
Ti estás aquí > Inicio / NOTICIA / Soa Bonaval amosará as fusións da música tradicional en Compostela
Soa Bonaval amosará as fusións da música tradicional en Compostela
setembro 28, 2022
Actuacións de Lucía Aldao, Catuxa Salom, Paraíso Canto, obradoiros e itinerarios sonoros. Estas son as propostas que fai o Museo do Pobo Galego para os vindeiros 30 de setembro e 1 de outubro no marco da segunda edición do festival Soa Bonaval. A cita "pretende rachar xéneros e etiquetas, en busca de músicas que van desde o electrónico ao folk, pasando polo pop, o rock ou o ambient, traballadas sobre sons clásicos e de raíz, e concibidas desde o local e a cultura propias".
O obradoiro "Da foliada ao rave", a cargo de Nacho Muñoz abre o programa na tarde do día 30. A experiencia formativa rematará cunha festa no propio Museo do Pobo cos materiais creados na mesma. Para sábado unha conversa-concerto coa poeta e artista coruñesa Lucía Aldao dará a coñecer os pormenores do seu traballo creativo para interpretar despois os temas de Pava, o seu primeiro proxecto musical en solitario.
A mestura de folclore galego con ritmos tribais de Catuxa Salom protagonizará a sesión vermú da xornada, mentres Paraíso Canto, proxecto de Martiño Malleiro e Gabi Reboredo, fechará o ciclo de concertos coa súa mestura de tradición oral galega con musicalidades ibéricas, lusófonas e doutras culturas do mundo.
Canda a estas propostas, o Museo desenvolverá o itinerario sonoro Son(Em)peza permite redescubrir a colección e os arquivos do Museo, escoitando pezas do patrimonio inmaterial vencelladas a diferentes obxectos.