CORREO
RSS
Ti estás aquí > Inicio / NOTICIA / Falece Antón de Santiago, barítono e divulgador da música clásica
Falece Antón de Santiago, barítono e divulgador da música clásica
xullo 6, 2022
Aos 77 anos de idade falecía este 5 de xullo o coruñés Antón de Santiago, coñecido nome do panorama lírico do noso país. Barítono, compositor, estudoso, crítico, docente e divulgador, o seu nome aparece vencellado ao longo do tempo a múltiples iniciativas como os apropósitos do Entroido da Coruña, que mantivo durante anos, a Agrupación Lírica Ofelia Nieto, que refundou, o grupo Magnificat de música religiosa, que creou, ou o Instituto de Estudos Coruñeses, do que era membro.
Desde emisoras como a Radio Galega, onde chegou a dirixir a sección de Cultura, ou Radio Voz desenvolveu un importante labor divulgativo con programas sobre música clásica, mentres o Conservatorio Superior de Música de A Coruña acolleu a súa faceta como docente.
Como crítico e investigador realizou unha completa biografía da soprano Ofelia Nieto ademais de múltiples artigos en medios como La Voz de Galicia. Como intérprete publicou os discos Irmán Daniel en homenaje a Castelao, ou No bico un cantar, cunha escolma de cantigas líricas galegas. O seu falecemento foi lamentado por diferentes persoeiros e entidades da cultura do país como a Orquestra Sinfónica de Galicia.