Ir ao contido directamente.


Ti estás aquí > Inicio / / 'Música no Ar' acollerá concertos de cámara en espazos patrimoniais de Pontevedra

TRECE ACTUACIóNS DIFERENTES DESDE ESTE MARTES E ATA FINAIS DE SETEMBRO

'Música no Ar' acollerá concertos de cámara en espazos patrimoniais de Pontevedra

CLáSICA/LíRICA | xuño 27, 2022

imaxe non dispoñible

O Castelo de Soutomaior acollerá este martes 28 o concerto "Retrato musical", da Orquestra Clásica de Vigo e Cintadhesiva, co que se fai a apertura do ciclo Música no Ar, organizado desde a deputación de Pontevedra. Pazos, mosteiros, igrexas, bens de patrimonio industrial, conxuntos etnográficos, espazos protexidos servirán de escenarios para este programa de música de cámara. Ata trece actuacións diferentes entre este martes e o 25 de setembro en outros tantos espazos singulares da provincia. Cuartetos, tríos e dúos de música de cámara con repertorios que van desde o clásico ao contemporáneo. Todas as actuacións son de balde, as de Soutomiaior e do castelo de Sobroso requiren inscrición previa.

Tralo paso polo Castelo de Soutomaior o programa recalará o 1 de xullo no Pazo da Crega de Barro onde actuará Nox Trío, que interpretarán un repertorio de mulleres compositoras do Barroco e Romanticismo. O día 2 de xullo na Praza da Igrexa de Vila de Cruces será a quenda do Quintento de metais e o 17 de xullo na Casa reitoral de Santa Mariña de Covelo actuará o cuarteto de saxofóns Dextrum Ensemble. O domingo 24 de xullo no Pazo de Pías de Nigrán soará a voz da soprano Begoña Salgueiro e a música de piano de Andrea García e o 30 de xullo no Pazo de Mos actuarán a soprano lírica Loli Crespo e o pianista Alejo Amoedo que interpretarán baladas e zarzuelas galegas. Xa en agosto o mércores 3 a Capela de San Bartolomeu de Moaña acollerá a Airas Ensemble. O domingo 14 de agosto no Mosteiro da Armenteira de Meis actuará Concerto das Donas, o grupo instrumental de cámara especializado na recuperación e interpretación de obras de mulleres compositoras, e o xoves 25 de agosto no exterior da Igrexa da Guarda a soprano Mila UT coa música de piano de Ana Belén Rodríguez.

“Música no Ar” rematará no mes de setembro con catro concertos. O primeiro deles o 8 de setembro no Castelo de Sobroso co Cuarteto de Corda da OV430. O venres 9 de setembro no Xardín da Casa das Navegacións de Baiona actuará o Trío Bórea, grupo de cámara fundado para explorar o progreso de novos modelos de interacción co público e desenvolver experiencias a través dos medios dixitais aplicados á música clásica. O sábado 17 de setembro no Mosteiro de Oia soará a voz da soprano Teresa Novoa co acompañamento ao piano de Carlos E. Pérez. O programa rematará o 25 de setembro na Igrexa de Reboreda de Redondela coa pianista Andrea González e Clara Panas, cun espectáculo interactivo, con proxeccións audiovisuais e narracións, e a alegre e colorida estética da deseñadora Ágatha Ruiz de la Prada, que dará a coñecer a fascinante historia de Rosendo Salvado.