CORREO
RSS
Ti estás aquí > Inicio / NOTICIA / Asociacións profesionais da cultura denuncian trato discriminatorio fronte a outros sectores
Asociacións profesionais da cultura denuncian trato discriminatorio fronte a outros sectores
outubro 7, 2020
Oito asociacións profesionais do sector cultural de ámbitos como o audiovisual, a música, a xestión ou as artes escénicas acaban de publicar un manifesto conxunto no que denuncian "un trato discriminatorio con respecto a outros sectores produtivos con máis capacidade de presión" ante a problemática derivada da pandemia de Covid-19. Segundo explican estes colectivos no texto, "a falta de claridade da normativa sanitaria aplicada, xunto coas restricións debidas a novos gromos en zonas localizadas, dificulta enormemente a celebración de eventos nos espazos, traslada á cidadanía unha mensaxe errónea de que a cultura non é segura".
Ante esta situación, reclámanlle á Xunta o establecemento dun "único criterio claro e inequívoco de capacidade de espazos" ademais da equiparación das salas de concertos privadas e espazos con licenza similar "aos espectáculos en espazos pechados, respectando as medidas que rexen para os teatros, o uso necesario de cadeiras e sempre nun horario que, contando o tempo de desaloxo da sala non supere nunca a unha da madrugada" o que permitiría a celebración de concertos neste tipo de locais.
Ademais, estes colectivos advirten que "se están suspendendo espectáculos sen causa xustificada", o que "ten un efecto perverso e multiplicador pois propaga a idea de que a cultura non é segura". Deste xeito, reclámanlle ás Administracións Públicas "que sexan conscientes das gravísimas consecuencias que teñen as cancelacións e aprazamentos nun sector estratéxico como o da Cultura" ao temo que solicitan medidas como cláusulas de cancelación e unha aposta decidida do sector público por estas actividades.
Nunha liña similar o manifesto avogar por manter as actividades culturais no ámbito escolar e reclama a declaración por parte da Xunta da Cultura como ben de primeira necesidade entre outras medidas.
Asinan o texto a Asociación Galega de Empresas de Artes Escénicas (Escena galega), a Asociación Galega de Empresas Musicais (AGEM), a Asociación Galega de Profesionais da Xestión Cultural (AGPXC), a Asociación Galega de Salas de Música (Clubtura), a Coordinadora Galega de Festivais de Cinema (Proxecta), a Asociación Sindical de Profesionais Técnicos do Espectáculo (Tesgal), Músicas ao Vivo (MAV) e mais a Unión de Cooperativas de Galicia (Espazo Coop).