CORREO
RSS
Uxía fai 25 anos na música con Meu canto
xuño 7, 2011
Quince temas que percorren o repertorio de Uxía en directo, dos cales só un fora gravado previamente. Esta é a proposta que fai esta intérprete en Meu canto, o disco co que conmemora os seus 25 anos no mundo da música. Da man do selo Fol, o proxecto achega temas xa clásicos como O verdegaio, A rianxeira, O ramo verde ou o Alalá das mariñas. O disco foi gravado en Rio de Janeiro con produción de Jaime Além e conta con colaboracións de Sérgio Tannus e a voz de Lenine en Os teus ollos.
O espectáculo en directo MEU CANTO percorrerá a partir das vindeiras semanas vilas, programacións, festas e festivais de Galicia e Portugal. Antes de subir ao primeiro dos escenarios de presentación, que a levará a pechar as festas de Ourense o vindeiro 26 de Xuño na Praza Maior, Uxía abre as portas dun dos seus ensaios a amigos, convidados e seareiros que queiran compartir con ela e coa súa nova formación as probas previas á posta en marcha do directo. Os ensaios abertos buscan o achegamento ao espectador e o intercambio de experiencias co público, consumidor final de todo produto cultural.
A cita será o vindeiro mércores 22 de Xuño a partir das 20 h no Salón Teatro de Santiago de Compostela. Máis información relativa ás condicións de asistencia e confirmación a través do Facebook de Nordesía Produccións así como da propia artista.