Comezou o luns en Compostela o simposio Portugal Hoje, un encontro que pretende dar a coñecer a actualidade do país luso e que trae a Galicia durante toda a semana ós nomes máis destacados da cultura e a arte do Alén Miño. Foi precisamente na xornada de onte deste encontro cando o director do Servícios da Língua Portuguesa e Intercâmbio Cultural do Instituto Cam›es anunciou a creación en Santiago dun Centro de Língua Portuguesa, o cuarto de todo o estado.
Portugal Hoje
O simposio Portugal Hoje, que se está a celebrar en diferentes facultades da Universidade de Santiago (USC) pretende ser un punto de encontro entre as realidades galega e portuguesa. Enfocado desde un punto de vista académico, o encontro conta coa participación de representantes da mediciña, a universidade, a economía e os medios de comunicación de Portugal, ademais de escritores, actores, músicos e persoeiros do mundo cultural luso.
Xa na primeira xornada do encontro, o luns, Felisa Rodríguez, unha das organizadoras do encontro denunciou a ausencia dunha comunicación fluída estable entre Galicia e Portugal. Segundo ela, "temos dificultade para saber o que acontece en Portugal, non hai o fluxo de comunicación que debería haber". Nesta primeira xornada tratouse tamén a situación económica portuguesa e a Facultade de Ciencias da Información acolleu a proxección do filme "Jaime" e contou coa presencia do realizador António Pedro Vasconcelos".
A xornada de onte estivo centrada na saúde da lingua portuguesa, que foi analizada pola filóloga María Elena Mira Mateus, que sinalou a necesidade de integrar o idioma na rede para asegurar a súa supervivencia. No mesmo sentido, o galego Carlos Quiroga denunciou a invasión lingüística que o portugués está a sufrir por parte do castelán en Brasil e Mozambique. Quiroga reivindicou a necesidade de que o galego aproveite o mercado cultural luso para favorecer a supervivencia da nosa propia lingua.
Unha mesa redonda sobre a situación do teatro en Portugal e a representación da obra "A barca do Inferno" completaron os actos de onte.
A literatura e a música centran os actos do mércores que contan coa participación de Álvaro Manuel Machado, profesor da Universidade Nova de Lisboa, a escritora Clara Pinto Correia e a editora e poeta Maria do Rosário Pedreira entre outros. Pola tarde realizarase unha mesa redonda sobre música coa participación de Enmanuel Frazao, José Carlos Dias, Pedro Pyrat e Alberto Augusto Miranda. A xornada rematará cun recital.
O encontro está organizado pola Cátedra UNESCO de Cultura Luso-Brasileira da Universidade de Santiago e é a continuación das xornadas "Brasil: 500 anos despois" que se celebraron o ano 2000.
Centro de Língua Portuguesa
Francisco Nuno Ramos, director de Servícios da Língua Portuguesa e Intercámbio Cultural do Instituto Cam›es anunciou onte no marco do simposio Portugal Hoje que esta entidade pretende crear en Compostela un Centro de Língua Portuguesa.
Este centro pretende facilitar o ensino de lingua portuguesa e un achegamento á cultura lusófona, e contará cunha ampla biblioteca e material multimedia. O Instituto Cam›es encárgase de potenciar a lingua e cultura lusa no estranxeiro e é expide os títulos internacionais de coñecemento do idioma portugués.
Actualmente só existe no Estado Español un centro deste tipo en Barcelona, aínda que están proxecto dous máis en Cáceres e Madrid. A elección de Compostela como sede para este centro obedece, segundo Francisco Ramos, á existencia da titulación de Filoloxía Portuguesa na cidade.
Tamén existe en Vigo unha delegación deste centro, que realiza diversas actividades de promoción da lingua portuguesa na cidade.