A casa natal de Carolina Otero ou a "Bela Otero", como era coñecida internacionalmente, acollerá o Museo Histórico do Concello de Valga. A corporación municipal aprobaba onte destinar 747.000 euros a este proxecto que, ademais de todo un andar dedicado á filla máis coñecida deste lugar dará acubillo a diferentes elementos do patrimonio do concello. Pola súa banda, o alcalde de Cospeito reclamaba onte protección para as antenas de radiolocalización que instalou o exército alemán neste concello durante a II Guerra Mundial. Logo de que o temporal tirase esta fin de semana un dos postes, de máis de cen metros de altura, o alcalde reclama que Defensa asuma a conservación destes elementos e anunciou que pretende mesmo establecer na zona un pequeno museo dedicado á historia destes aparellos e ao sistema de radiodetección CONSOL.
Máis información sobre o museo de Valga en La Voz de Galicia; sobre as antenas de Cospeito no web Militaryruins.tk e na edición de hoxe de El Progreso