Os seareiros que acudan o día 29 ao partido de fútbol Galicia - Uruguai recibirán un agasallo ao entrar no estadio de San Lázaro. A Consellaría de Cultura e Deporte editou quince mil exemplares do libro Selección galega que recolle narracións breves de once ilustres autores galegos falecidos e vai repartilos de balde entre o público asistente antes do inicio do partido co obxectivo de aproveitar a expectación do partido para difundir unha mostra da nosa literatura. O libro inclúe Conto gallego, de Rosalía de Castro; Chegou das Américas e O pai de Migueliño, de Castelao; Os europeos en Abrantes, de Vicente Risco; O sorrir da serea, de Otero Pedraio; A arrasadeira, de Blanco Amor; O vello que quería ver o tren, de Rafael Dieste; O señor Cordal, de Álvaro Cunqueiro; Suicidio frustrado, de Ánxel Fole; O home da rosa branca, de Avilés de Taramancos; Que vello estás e que gordo!, de Carlos Casares e O señor Manuel da brocha grosa, de Manuel María.
