A Casa das Máquinas de Santiago de Compostela acolle este 25 de abril o encontro Poñer a voz. Baixo a forma dun programa de radio, o Colexio de Xornalistas homenaxea a Begoña Caamaño cun esta actividade que lembra a actividade da protagonista do Día das Letras no ámbito da comunicación.
A partir das 12 horas da mañá, Mónica Rosas conducirá esta iniciativa na que diferentes profesionais que traballaron con Caamaño alternarán as súas voces coas de representantes doutras xeracións de xornalistas. Lectura de textos da autora, intervencións do público e un concerto de Uxía completan o encontro, no que está prevista a presenza de nomes como Ana Romaní, María Xosé Porteiro, Pablo Lago, Sonia Díaz, Marga Tojo ou Lucía Junquera.
Precisamente Junquera dirixe o pódcast que o Colexio de Xornalistas elaborou sobre Begoña Caamaño co mesmo título da xornada. A proposta repasa a vida da homenaxeada a atender "desde a súa infancia e xuventude en Vigo, onde prende a paixón por contar historias, ata a súa implicación vital no feminismo, no coidado da lingua, no antimilitarismo e na defensa dos medios públicos". Incide ademais na importancia do xornalismo como nexo da súa actividade, tanto a través da radio como dos artigos en prensa e revistas especializadas. Esta produción de cinco capítulos está a se publicar semanalmente nas principais plataformas de audio e mais no web do Colexio.
