Detalle do tramo do lenzo interior entre os cubos XXIX e LVIII da muralla de Lugo
A finais do mes pasado, aprobouse a licitación do plan de conservación da muralla de Lugo 2025-2026 por máis dun millón de euros. O plan contempla intervencións de mantemento integrais na muralla, tanto de reparacións como de limpeza vexetal e protección da biofauna vinculada a ela. No informe do arquitecto responsable deste inmoble Patrimonio da Humanidade figuran catorce puntos críticos, polo seu mal estado de conservación, ao longo do perímetro amurallado. As afeccións son variadas, desde os desprendementos ou a polución ata as filtracións de auga ou a degradación xeral do granito, especialmente afectado nalgunhas portas da muralla. O plan define actuacións ao longo do ano en función da estación. O documento da licitación detalla de xeito exhaustivo todos os puntos afectados da muralla en termos de áreas moi concretas do paramento da construción.
